Jezu - Apalaí

Here are some extracts from a Apalaí translation of the Bible that talk about Jesus. The extracts are from the Gospel of Mark.

Image of text
Image of text

Get Adobe Reader to view this pdf filePDF version extracts of Mark (73kB)
PDF version whole of Mark (258kB)
You will need Adobe Reader to view pdf files, which can be downloaded free here

Font
To view this page properly, you can download the necessary font here.


1.1
Sero nase omi kurano Jezu Kyrixtu Ritonõpo mũkuru poko.

1.14-15
Imehnõ amorepapitotopõpyry Jezu a Karirea po
(Mat 4.12-22; Ruk 4.14-15; 5.1-11)
14 Morarame ãpuruhpyry taka João tõmapose ahtao Erote a, Jezu toytose ropa Karirea pona. Ritonõpo omiry poko imehnõ amorepase toytose ynororo.
15 —Ritonõpo emero se typoetoryme. Seromaroro ah oesẽkõme nexino. Oorypyrykõ irumekatoko. Aomipona ehtoko, tykase ynororo morotõkomo a.

1.21-27
Jorokohpe aexihpyry poko
(Ruk 4.31-37)
21 Morarame Kapanaũ pona toytose toto. Mame juteu tõ oserematohae toto oturutoh taka Jezu tomõse mokaro amorepatohme tyya. 22 Mame tõsenuruhkase toto Jezu omiry etaryke tyya xine.
—To! Orẽpyra amorepato mose nase. Moeze omihpyry poko amorepatõkõ sã pyra nase. Orẽpyra nase, tykase toto. 23 Morarame jorokohpã tooehse morotona. Toto atamorepatoh taka tomõse ynororo. Ynara tykase ynororo opore,
24 —Oty se hma Jezu, Nazarepohno? Yna enahkapory se hmahno? Awaro ase. Ritonõpo mũkurume oexiry waro ase. Inenehpohpyry kurãme mase, tykase jorokohpã Jezu a opore.
25 Mame joroko tyenonohse eya,
—Mynyhme exiko. Otũtako ropa mokyro ae. Jũme irumekako ropa, tykase Jezu eya.
26 Morarame jorokohpã tõsẽtorimase. Kui tykase ynororo opore. Morarame tutũtase ropa joroko mokyro ae. 27 Mame tõsenuruhkase morotaõkõ emero.
—Enẽko matose tyoro inamorepatary. Orẽpyra mana. Joroko tõ tũtanohpory ropa waro roropa ynororo, tykase toto oxime rokene.

1.32-34
Kurãkõkara kurãkatopõpyry ropa Jezu a
(Mat 8.16-17; Ruk 4.40-41)
32 Mame kokonie pukuro kurãkõkara tarose imehnomo a tuhke Jezu a, toto kurãkatohme ropa. Jorokohpãkõ roropa tarose eya xine. 33 Kapanaũpõkõ roropa tooehse tuhke imoihme. Tapyi eutary pota taka tõximõse toto. 34 Mame kurãkõkara tukurãkase ropa eya, tuhke. Joroko tõ tutũtanohpose roropa eya mokaro ae. Joroko a sekerekamexipopyra kynexine ynororo, “Awaro ynanase,” karyke eya xine.

2.1-12
Pakaihkapỹ kurãkatopõpyry ropa Jezu a
(Mat 9.1-8; Ruk 5.17-26)
1 Morotoino toytose ropa Jezu Kapanaũ pona. Mame imehnõ tõturuse ipoko. Ynara tykase toto,
—Tooehse ropa Jezu mana tytapyĩ taka, tykase toto ipoko. 2 Mame morotona tooehse toto imoihme. Tapyi typehkase eya xine. Tapyi eutary pota tao tõximõse toto. Morarame tamorepase toto Jezu a Ritonõpo omiry poko. 3 Morarame pakaihkapỹ tonehse imehnomo a Jezu a ikurãkatohme ropa. Asakoropane kynexine enehnanomo. 4 Yrome omõsaromepyra toh kynexine ahno tuhke exiryke. Morarame tapyi mypatarãnaka tõnuhse toto. Tapyi typiapose eya xine Jezu etonie. Mame kurãkara tonyhtose eya xine moro ae etueh maro Jezu myhtokoxi.
5 —Kurãkatõ mokyro, tykase toto tukurohtao xine. Mame toto kurohtao tonetuputyry waro Jezu kynexine. Mame ynara tykase ynororo kurãkara a,
—Aimo, oorypyry korokãko ase, tykase ynororo eya.
6 Moroto Moeze nymerohpyry poko amorepatõkõ kynexine, typorohse. Tohne toehse toto Jezu omiry etaryke tyya xine.
7 —To! Morara kary popyra mana. Ritonõpo poenohnõko rokẽ mose mana. Ritonõpo rokẽ popỹ rypyry korokary waro mana, tykase toto. Jezu kerekeremãko toh kynexine tukurohtao xine.
8 Yrome Jezu tuaro kynexine. Tykerekeremary tonetupuhse eya.
—Oty katoh ykerekeremãko matou okurohtao xihne? tykase ynororo eya xine. —Ywy ase Kapu ae Ayhtohpyry. 9 Iirypyrymãkõ rypyry korokary waro ase. Kurãkõkara kurãkary waro roropa ase. 10 Naeroro mose kurãkãko ropa ase, iirypyrymãkõ rypyry korokary waro jexiry waro oehtohkõme, tykase ynororo eya xine.
Mame ynara tykase pakaihkapyny a ynororo,
11 —Tukurãkase ropa mase. Owõko ropa. Oetueh aroko ropa atapyĩ taka, tykase ynororo eya.
12 Mame kuranõpokara towõse ropa totueh tapoe. Totueh tarose ropa eya. Mame tutũtase ropa ynororo tapyi tae imoihmãkõ neneryme. Mame tõsenuruhkase toto.
—To! tykase toto. —Kure Ritonõpo imehtiko. Mosero panõ onenepitopyra sytatose, tykase toto.

4.35-41
Tyryrykane mynyhpãkatopõpyry poko Jezu a
(Mat 8.23-27; Ruk 8.22-25)
35 Morarame tykohmãse ahtao,
—Ehmaropa ikuhpo mõpozakoxi, tykase Jezu typoetory tomo a. 36 Morarame imoihmãkõ enyokyryhtao tyya xine tõtyrise toto kanawaka, Jezu arotohme kanawae. Imepỹ kanawa roropa ĩkapo toytose. 37 Morarame tyryry tykase itamurume. Tyryry karyhtao sapararah tykase pohkane kanawa pokona. Kanawa nerymary se toehse pohkane. 38 Jezu nyhnõko kynexine kanawa ãtykyo. Zupuhpyry tapõke kynexine.
—Tuisa, yna pyno pyra hma? Nerỹko reh sytatohse, tykase toto eya.
39 Mame typakase ropa Jezu. Tyryrykane tymynyhpãkapose eya,
—Omynyhpãko, pohkara exiko, tykase Jezu. Mame tyryry tykakehse, mynytyme konõto rokẽ toehse. 40 Mame ynara tykase typoetory tomo a,
—Oty katoh oserehnõko matou? Jenetupuhpyra ro hmatohu? tykase ynororo eya xine.
41 —To! tykase toto tyya xine tõsenuruhkase toto,
—Mosehxo reh imehxo nahse. Tyryrykane mynyhpãkapono, pohkane roropa mynyhpãkapono, tykase toto oseya rokene.

5.22-24
22 Morarame juteu tõ atamorepatoh esẽ tooehse, esety Jairu. Jezu pupuru myhtokoxi typorohse ynororo.
23 —Tuisa kuakorehmako ajohpãme samo. Jẽxiry orihnõko mana. Ymaro eropa ajohpãme samo. Oemary tyrikose epona aekurãkatohme ropa, orihpyra aehtohme, tykase ynororo eya.
24 Mame imaro toytose Jezu. Yrome ahno imoihmãkõ Jezu maro toytose. Ytopyra sã kynexine tuhke ahno exiryke.

5.35-42
Jairu ẽxiry ẽsemãkatopõpyry ropa Jezu a
(Mat 9.23-26; Ruk 8.49-56)
35 Morara karyrohtao Jairu tapyĩ tae tooehse toto.
—Oẽxiry norihno. Amorepatõ onerekohmara exiko, tykase toto aorikyhpyry zumy a.
36 Yrome mokaro otururu totase Jezu a,
—Oserehpyra exiko. Ãkorehmary enetupuhko ya, tykase Jezu aorikyhpyry zumy a.
37 Morarame typoetory tõ rokẽ tarose eya, Peturu, Tiaku, João, enara rokene. Tiaku akorõ João kynexine. 38 Morarame toeporehkase toto Jairu tapyĩ taka. Tuhke ahno moroto kynexine xitaketomo, aorikyhpyry hnamonanomo, enara. 39 Morarame tapyi taka tomomyryhtao ynara tykase ynororo eya xine,
—Oty katoh panaikato matou, xitãko? Xitara ehtoko. Mose orihpyra nase. Nyhnõko rokẽ nase, tykase Jezu eya xine.
40 Morarame tounohse eya xine. Mame emero Jezu a tutũtanohpose ropa toto tapyi tae. Jũ maro rokẽ tomõse toto, jumy, jeny, typoetory tõ oseruao. Enara toh tomõse aorikyhpyry enese. 41 Morarame emary tapoise Jezu a.
—Tarita kumi, tykase ynororo aomiry ae. “Orymo, owõko ropa,” katopo.
42 Morara kaxĩpo sã rokẽ tõsemãse ropa ynororo. Toytoytose ropa ynororo toehsehxo exiryke. 12me ikonopory nae kynexine ynororo. Tãkye toehse ropa jũ tomo.

7.18-23
18 Mame tozuhse toto eya,
—Amarokõ roropa onenetupuhpyra matou? Etatoko pahne, emero otyro enapyryhtao oya xine iirypyryme rito pyra mana. 19 Waku aka rokẽ tykyrysã omõnõko mana. Yrome kuzenukõ aka omõpyra mana. Mame wekanohtao tũtãko ropa mana, tykase ynororo.
(Morara exiryke emero tõsẽ kure Jezu omi poe.)
20 Morarame tõturuse ropa ynororo eya xine. Ynara tykase ynororo,
—Okurohtao xine popyra awahtao xine iirypyryme exĩko matose. 21 Ynara exiryke, tukurohtao xine iirypyryme epohnohketõ popyra exĩko roropa mana. Ematonãko te, karimotãko te, imehnõ pyty poko exĩko te, 22 imehnõ mõkomory poko typenetarykõ poko te, imehnõ ryhmary poko te, imehnõ enekunopyry poko te, typenetatoh xihpyry poko te, imehnõ zumoxike exiry poko te, imehnõ kerekeremary poko te, tõsenetaonopyry poko te, ajoajohpe toexirykõ poko, enara. 23 Morohne tũtãko mã okurohtae xine. Naeroro iirypyryme exĩko matose, okurohtao xine popyra oepohnopyrykõke, tykase Jezu eya xine.

9.2-8
Jezu maro Moeze ehtopõpyry Eria maro
(Mat 17.1-13; Ruk 9.28-36)
2 Morarame 6me tõmehse ahtao, typoetory tõ tarose ypy kae tokõ pona. Peturu te, Tiaku te, João, enara toh tarose eya. Moroto tanyhtase ynororo. 3 Zupõ saereme toehse, karimutume konõto toehse, emero ikurikasenã motye toehse, karimutume kuhse. 4 Morarame Eria tõ tooehse Moeze maro, pake Ritonõpo omi poe urutonõpo tomo. Mame toto neneryme Jezu maro oturũko toh kynexine. 5 Morarame toto eneryke tyya ynara tykase Peturu,
—Jezu, kure reh taro sytatohse. Tapyi pitiko ynanamoxi oseruao axĩtao rokene, toiro atapyĩme, toiro Moeze tapyĩme, toiro roropa Eria tapyĩme, enara ehtohme, tykase ynororo eya.
6 Tõserehse toexiryke morara tykase Peturu. 7 Mame Jezu tõ otururuhtao ro akurũ tooehse.
—Umũkuru nymyry mosero, Umũkuru kurano. Mose omiry etatoko, tykase Ritonõpo akuru htae.
8 Morarame,
—Ỹkae enexi ropa, tykase toh repe. Toto esahpyry pona rokẽ tõsenuhmase toto. Jezu rokẽ moroto, toto esahpyry po.

12.28-31
Zae ehtoh poko Ritonõpo omipona
(Mat 22.34-40; Ruk 10.25-28)
28 Morarame Moeze omihpyry warõ tooehse, mokaro oseosezukuru etase. Jezu a toto ezukuru kure etaryke tyya ynara tykase ynororo Jezu a,
—Ritonõpo poe Moeze nymerohpyry tuhke nae, aomipona kuehtohkõme. Morara exiryke oty riry kurehxo nae Ritonõpo a? tykase ynororo tõturupose Jezu a.
29 Ynara tykase Jezu eya,
—Ynara kure Ritonõpo a, “Etatoko pahne, Izyraeu tomo. Toiro rokẽ Ritonõpo nae. Ynoro rokẽ oesẽkõme mana. 30 Morara exiryke ipyno ehtoko ipunaka. Oesẽkõme tyritoko okurohtaka xine. Imehxo tyritoko õmirykõ ke. Kure rokẽ tyritoko õsenetupuhtohkõ ae oorikyrykõ ponãmero.” 31 Ynara katoh roropa kure Ritonõpo a mana, “Osepyno oexirykõ sã imehnõ pyno ehtoko,” katoh kure roropa Ritonõpo a mana. Morara katoh asakoro kure Ritonõpo a mana, tykase Jezu eya xine.

14.10-11
Jezu ewokary se Juta ehtopõpyry poko
(Mat 26.14-16; Ruk 22.3-6)
10 Morarame Juta Ixikariote Jezu poetoryme kynexine repe. Mame toytose ynororo Ritonõpo maro oturuketõ tuisary tomo a Jezu ewokase. 11 Mame aomiry etaryke tyya xine tãkye toehse toto.
—Oepehmãko reh ynanahse, tykase toto Juta a. Naeroro toytose ropa ynororo. Tãtamorepase itamurume Jezu ewokatoh poko tyya.

14.44-46
44 Mame eporehkara ro tahtao xine ynara tykase Jezu ewokary se exikety tymarõkomo a, “Etatoko pahne, Jezu maro rokẽ oturũko ase. Eahmãko sã ase. Ipohnõko ase. Moro eneryhtao oya xine enetupuhnõko matose. Jezu mokyro. Apoitoko,” tykase Juta eya xine.
45 Mame tooehse ynororo topohme Jezu a.
—Tamuxi, taro hma? tykase eya. Mame toahmase. 46 Morarame Jezu tapoise eya xine.

15.6-15
Jezu ekarotopõpyry aorihmapotohme
(Mat 27.15-26; Ruk 23.13-25; Jo 18.39-19.16)
6 Morarame ãpuruhpyry tao tuhke ẽmapotyã kynexine. Mame otuhtoh konõto ae toine emapotyã tũtanohposene kowenu, jeimamyry punero, imoihmãkõ omi poe. 7 Kowenu zehno aehtyã roropa tõmapose kynexine ãpuruhpyry taka, ahno etapahpõkomo. Toiro esety Parapa kynexine. 8 Imyhpokary poko oturuse tõximõse imoihmãkõ ahtao Pirato ẽpataka, 9 ynara tykase Pirato eya xine, tõturupose,
—Juteu tõ tuisary myhpokapory se hmatou ya? tykase ynororo eya xine. 10 Tuaro kynexine ynororo. Jezu tapoise Ritonõpo maro oturuketõ tuisary tomo a ekarotohme eya zumoxike toexirykõke. Moro waro Pirato kynexine.
11 Mame Ritonõpo maro oturuketõ tuisary omi poe Parapa tũtanohpory se toehse imoihmãkomo. 12 Morarame tõturupose ropa Pirato eya xine,
—Otara mokyro juteu tõ tuisary ripõko hano? tykase ynororo eya xine repe.
13 Opore tozuhse ynororo eya xine. Kui tykase toto,
—Wewe pokona exixihmapoko! tykase toto.
14 —Oty katohme? Azahkuru pyra mana. Iirypyryme pyra roropa mana, tykase Pirato eya xine.
Oporehxo tozuhse ynororo eya xine. Kui tykase rokẽ toto,
—Wewe pokona exixihmapoko! tykase toto.
15 Mame imoihmãkõ ãkyemapory se Pirato exiryke, Parapa tutũtanohpose ropa eya. Mame Jezu typipohpose Pirato a. Moromeĩpo tokarose ynororo soutatu tomo a aorihmapotohme.

15.33-39
Jezu orihtopõpyry
(Mat 27.45-56; Ruk 23.44-49; Jo 19.28-30)
33 Morarame tãxiahtao tyarumãkapose Ritonõpo a pata tõ punero. Mame xixi tyhtosehxo ahtao tõmehse ropa. 34 Morarame opore Jezu tykohtase. Ynara tykase ynororo,
—Eroi, Eroi, rema sapahtani, tykase. Tõmiryae morara kary ynara katopo, “Ritonõpo, Ritonõpo oty katohme kurumekano?” katopo.
35 Mame enenanõ ikui etaryke tyya xine, ynara tykase toto,
—Etatoko ke! Eria kohmãko mana, tykase toto. 36 Mame imepỹ axĩ tururume toytose mauru panõ zumyhkase ikatainety aka. Wewe pitiko pokona tyrise eya Jezu ohpatohme.
—Seraximatone. Senetone. Otarãme Eria oehnõko mana mose ouse wewe poe, tykase toto, tõturuse.
37 Morarame Jezu kui tykazomose ahtao komih tykakehse. Toorihse rahkene.
38 Morara ahtao ãpuruhpyry toexihkase Ritonõpo maro oturutoh tao, kamisa risemy. Kaino toexihkase zuhkurenaka. 39 Morarame soutatu tõ esẽ Jezu ẽpataka kynexine. Jezu a komihkakepyry eneryke tyya ynara tykase ynororo,
—Ajohpe pyra ro rukuh Ritonõpo mũkurume nexiahse, tykase ynororo.

15.42-46
Zonẽtopõpyry
(Mat 27.57-61; Ruk 23.50-56; Jo 19.38-42)
42 Morarame kokonie pukuro otuhtoh riryhtao, oserematoh pyra ro ahtao roropa Joze a tunõkase Pirato. 43 Eya toytose Jezu ekepyry ekaropose. Joze Arimateapõ kynexine, imehnõ tuisaryme exikety kynexine. Ritonõpo omipona exikety roropa kynexine. 44 Mame Pirato a tozuhse,
—Ajohpe pyra rukuh norihno? tykase ynororo. Soutatu tõ esẽ tonehpose tyya tõturupotohme Jezu orihtopõpyry waro toehtohme. 45 Mame turuse tahtao eya Jezu orihtopõpyry waro toehse Pirato.
—Ekepyry arotoko, tykase ynororo Joze a. 46 Morarame kamisa karimutumã topekahse eya Jezu ekepyry zõtotohme. Touse ahtao wewe poe tyõtose eya topu eutary risẽ aka tyritohme. Morarame topu parihmã ke okepy ẽ tapuruse eya.

16.1-7
Ẽsemãtopõpyry ropa
(Mat 28.1-8; Ruk 24.1-12; Jo 20.1-10) 1 Morotoino oserematoh tõtyhkase ahtao ixtaratu topekahse toto a okepy popatohme, Maria Matarena a, Sarome a, Maria Tiaku eny a. Enara ixtaratu epekatyhpõkõ kynexine. 2 Pakeimo yrokokoro toytose toto okepy enese, xixi tũtara ro ahtao. 3 Toytorykohtao tõturuse toto,
—Otarahxo koh topu syryhmãko sytano? tykase toto, (zumo topu exiryke).
4 Mame toeporehkase tahtao xine topu tysyryhmase tonese eya xine okepy apuru. 5 Mame okepy ẽ aka tomõse toto. Moro tao nuasemã tonese eya xine, typorohse tapotunuru wino, karimutumã ke tupoke.
6 Mame tõserehse toto. Mokyro a turuse nohpo tomo. Ynara tykase ynororo eya xine,
—Oserehpyra ehtoko. Jezu zupĩko matou, Nazarepono, exixihmahpyry? tykase mokyro eya xine. —Nẽsemãno ropa. Nowõno ropa. Taro arypyra mana, esahpyry rokẽ taro mana. Enetoko pahne. 7 Morara exiryke ytotoko. Jezu poetory tõ zurutatoko. Peturu roropa kẽ zurutoko. Jezu ytõko mana osemazuhme Karirea pona. Moroto eporỹko matose inekarotopõpyryae ro, tykase mokyro nohpo tomo a.

16.15-16
15 Morarame typoetory tõ taropose eya,
—Ytotoko emero pata tõ punero. Jomiry ekarotatoko emero ahno a. 16 Jenetuputyryhtao eya xine tosẽkõme Ritonõpo poetoryme exĩko mã toto, tõpurihkase ahtao. Yrome jenetuputyry se pyra toto ahtao, Ritonõpo roropa toto se pyra exĩko mana, apotoimo htaka rokẽ toto aropõko mana.

16.19-20
Jezu arotopõpyry kakoxi kapu aka
(Ruk 24.50-53; At 1.9-11)
19 Morarame tõturukehse tahtao Jezu tõnuhse rahkene kapu aka. Mame typorohse ynororo Ritonõpo apotunuru wino. 20 Morarame Jezu poetory tõ toytose Ritonõpo omiry ekarose emero pata tõ poro. Mame typoetory tõ maro toerohse Jezu. Tyjamihtanohse toto eya tõmiry ekarotohme eya xine, kurãkõkara kurãkatohme roropa eya xine. Enara.



Font Downloads

  • Charis SIL 4.100 font release (Windows, Macintosh and Linux) NRSI staff, 2007-01-31 Download "CharisSIL4.100.zip", ZIP archive for users with WinZip, 2MB
  • Charis SIL 4.100 font release (Windows and other) NRSI staff, 2007-01-31 Download "CharisSIL4.100.exe", Windows application, 2MB
  • Charis SIL 4.100 font release (Debian package, GNU/Linux) NRSI staff, 2007-02-08 Download "ttf-sil-charis_4.100-1_all.deb", Debian Linux Package, 2MB


Copyright information: